Opinyon sa DOJ dili executory - Achas

“KINING DOJ (Department of Justice) opinion, is this [executory]? Is this binding?”

Kini ang pamahayag ni Minority Floor Leader Christian Rustico Achas, sa sesyon niadtong Lunes nga gidumala ni Presiding Officer Pro Tempore Konsehal Romeo Calizo, agig reaksiyon sa special report ni Councilor James Judith mahitungod sa pag-takeover sa Local Water Utilities Administration (LWUA) interim officials diha sa Cagayan de Oro Water District (COWD).

Matud ni Judith, kinahanglang sundon sa LWUA ang legal nga opinyon sa DOJ mahitungod sa pag-takeover niini sa COWD, human miresulta kini sa ‘internal management squabble’ sa maong buhatan.

Sa iyang bahin, mibutyag si Achas nga dili obligado ang LWUA nga sundon kini tungod gisaad sa maong opinyon nga ‘for information and guidance’ lamang kini ug ang korte mao ang nay gahom og mandato mahitungod sa isyu.

“Dili na nato disturbohon and COWD,” sugyot sa konsehal, human iyang giingon nga naa nay saktong panlantaw ang interim general manager sa pag-ayo sa mga non-revenue water.

Giaghat usab ni Achas ang mga miyembro sa konseho nga magpabiling neutral sa maong isyu.