Online Pag-IBIG STL application sa City Hall mapatuman na

Gipaabot nga mahatagan na sa kasayon sa pag-apply alang sa Short Term Loan (STL) sa Pag-IBIG Fund ang mga kawani sa City Hall.

Kini human giuyonan sa konseho sa syudad sa sesyon kagahapon nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Home Development Mutual Fund (Pag-IBIG Fund) nga naglangkob sa pagpatuman sa online o’ virtual Pag-IBIG alang sa STL applications.

Niini, ang mga aplikasyon alang sa multi-purpose loan o’ calamity loan mahimo nang isumete online sa bisan unsang oras o’ maski asa nga dapit.

Hinuon, ang lokal nga kagamhanan gikinahanglang magtumbok og Authorized Approving Officer (AAO) gikan sa buhatan sa Human Resource Management Office aron mag-verify, confirm ug certify sa mga aplikasyon sa STL sama sa kasamtangang gipatuman nga aplikasyon sa GSIS loans.

Ang ordinansa nga gipalabang sa konseho alang sa maong katuyuan gipaluyohan sa komite sa pamalaod ni Konsehal Edgar Cabanlas.