Ocon pabor sa subling pag-operate sa sabong dinhi sa CDO

SUPORTADO ni Konsehal Zaldy Ocon, chairman sa komite sa public works, nga hinay-hinay nang ablihan ang negosyo sa sabong dinhi sa syudad human lakip nga napa-ubos sa alert level-1 ang Cagayan de Oro.

Kini ang pamahayag sa konsehal human si Konsehal Romeo Calizo, sa sesyon sa konseho niadtong Lunes nga gidumala ni Bise Mayor Kikang Uy, mitaho sa hangyo sa operator sa usa sa mga cockpit arena nga mahatagan sa higayon nga ma-renew ang ilang business permit.

Sumala ni Ocon nga angayan nang tugotan ang mga negosyo nga temporaryong nagsira gumikan sa Covid-19 nga subling mag-operate ug magtamod sa minimum health standards nga gihan-ay sa IATF sama sa pagsuot kanunay sa facemask, physical distancing ug makanunayong paghugas sa kamot.

Nagtoo si Ocon nga makabangon na ang ekonomiya sa syudad ilabina nga ubos na sa alert level-1 ang dakbayan tungod kay daghan nang mga negosyo ang posibleng makabalik ug daghan na usab ang mahatagan sa kahigayonan nga makapanarbaho.