Ocon naninguha nga maila ang nahimong legasiya ni Cong. Damasing

Si konsehal Zaldy Ocon, chairman sa Komite sa Engineering, naninguha nga maila ang mga maayong nahimo ni kanhi Congresman Erasmo Damasing Jr. sa dihang nag-alagad pa kini isip kongresista sa syudad.

Kini ang unod sa special report ni Konsehal Ocon atol sa sesyon niadtong Lunes nga gidumala ni Bise Mayor Kikang Uy.

Sumala sa konsehal nga daghan ang nahimo ni Cong. Damasing nga mga proyekto sa dakbayan ug tipik niini mao ang pagtukod sa Puntod -Kauswagan Bridge, pagbalhin nga madumala sa Department of Health (DOH) ang kanhi Provincial Hospital nga karon gitawag nang Northern Mindanao Medical Center (NMMC) sa tumong nga daghang katawhan ang maalagaran ug ang iyang paningkamot nga dinhi matukod sa syudad sa Cagayan de Oro ang Court of Appeals (CA).

Dugang ni Ocon nga gawas sa iyang pagkayano nga kongresista, respitado siya sa hawanan sa congreso tungod sa kalantip sa iyang salabotan hinungdan nga daghan mga mehoras ang iyang nadala dinhi sa syudad.

Gipasabot usab ni Ocon nga angayan nga maila ang legasiya ni Congresman Damasing pinaagi sa pagbutang sa iyang pangalan sa mga proyekto nga iyang nahimo.

Niini ang sugyot ni Ocon giduso ni Bise Mayor Kikang Uy ngadto sa Komite sa Turismo ni Konsehal Jay Roa Pascual alang sa dugang pagtoon ug rekomendasyon.