Nazareth nagpasalamat sa DPWH sa suporta sa imprastraktura

ANG komitiba sa barangay affairs sa Konseho ubos ni Konsehal Yan Lam Lim gikatakdang motuki sa resolusyon nga gipadala sa Barangay Nazareth nga nagpadayag sa ilang pagpasalamat sa Department of Public Works and Highways (DPWH) tungod sa padayon nga suporta ug dakong kontribusyon sa pagpalambo sa imprastraktura sa komunidad.

Pinaagi sa Resolution No. 10, Series of 2025, gipasalamatan sa barangay ang DPWH 2nd District Office tungod sa ilang paningkamot sa pagpahapsay sa mga dalan, drainage system, ug pampublikong pasilidad, nga nagpauswag sa kalidad sa kinabuhi sa mga residente sa Nazareth.

Lakip sa mga mahinungdanong proyekto nga nahuman sa miaging 2024 mao ang pagpaayo sa Demetrio Velez Street ug drainage system niini, ang pag-renovate sa Barangay Nazareth Gym ug Lupon Office, ug ang pag-instalar og 72 solar-powered streetlights sa nag-unang mga dalan sama sa Sitios 31st, Nazareno, San Jose, YGO, 15th–26th, ug Kawayanan. Kini nga mga proyekto nakapakunhod sa problema sa baha ug nakapauswag sa seguridad ug kasayon sa publiko sa pag-access sa mga dalan.

Gitumbok ug gidayeg sa mga opisyal sa barangay, pinangulohan ni Punong Barangay Atty. Regine Beatrice T. Rodriguez, ang dako nga epekto sa mga inisyatiba sa DPWH nga nakatabang og dako sa kalambuan sa barangay.

Uban sa padayong panag-uban sa DPWH, naglaum ang Barangay Nazareth sa padayon nga progreso sa umaabot nga katuigan. (JAOclarit/SP)