Nacaya suportado pagmugna og STP dinhi sa syudad

SUPORTADO ni Konsehal Ian Mark Q. Nacaya, Chairman sa Komite sa Planning, Research and Innovation and Peoples Organization Accreditation, ang Sewerage Treatment Plant Project (STPP) dinhi sa syudad.

Kini ang gibutyag sa konsehal atol sa sesyon niadtong Lunes nga gidumala ni Bise Mayor Bebot Rodriguez human mihatag og presentasyon ang representante sa buhatan sa Department of Public Works and Highways (DPWH-Central Office) kabahin sa sugyot pag-estabilisar sa sewerage treatment plant diha sa Barangay Bonbon ning syudad.

Nasayran nga ang maong proyekto adunay subsidy sa DPWH nga mobalor og P1.8 bilyones. Giklaro ni Nacaya nga usa kini ka multi-billion nga proyekto ug 50% niini ang igahin sa kagamhanan sa dakbayan isip counterpart sa subsidy nga ihatag sa DPWH.

Angayan lamang nga hatagan og tukmang pagtuon ang pipila ka punto nga gikabalak-an nga makaapekto sa kinaiyahan ug sa panglawas sa katawhan sa dakbayan, sumpay sa konsehal.

Niini, usa ka resolusyon ang gisagop sa konseho isip Committee of the Whole nga mohimo sa parallel nga pagtuon o pagrepaso sa mga kalihokan sa mga implementor sa gisugyot nga septage treatment plant diha sa Barangay Bonbon, ning syudad.