Nacaya pabor mapalambo natad sa transportasyon

DAKONG uyon si Konsehal Ian Mark Nacaya nga mapalambo ang natad sa transportasyon dinhi sa dakbayan sa Cagayan de Oro. Mao kini ang iyang gibarugan atol sa sesyon sa konseho niadtong Lunes nga gidumala ni Bise Mayor Bebot Rodriguez human si Konsehal James Judith II misugyot sa pagpalabang og ordinansa nga maghatag og panugot sa mga bao-bao nga makapamasahero.

Gipasabot sa konsehal nga wala siyay pagsupak sa operasyon sa mga pampublikong transportasyon. Gani, iyang gipaninguha nga mahatagan sa katumanan dinhi sa dakbayan ang operasyon sa train system, rapid bus transit system ug uban pa.

Apan, matod niya, dili masuportahan ang operasyon sa usa ka public transport system kun sukwahi kini sa regulasyon sa nasudnong kagamhanan. Gitumbok ni Nacaya ang regulasyon sa LTO ug LTFRB nga naghatag og panugot sa mga bao-bao nga makabyahe dinha sa kadalanan apan sa pribadong katuyuan lamang. Kun dili itugot nga makasingil og pletihan ang mga bao-bao, dili gayud kini makapamasahero, panapos ni Konsehal Ian Mark Nacaya. (JNortiza/SP)