Nacaya naninguha sa kusog, paspas nga internet connection

ADUNAY mahimong mga pamaagi nga mokusog ug mopaspas ang internet speed dinhi sa dakbayan sa Cagayan de Oro.

Mao kini ang giluwatan ni Konsehal Ian Mark Nacaya atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod niya nga iyang gilantaw nga ang dakbayan masama sa ubang nasud sama sa Singapore, Malaysia, USA ug Europa nga paspas kaayo ang internet connection tungod kay dako kini og matabang ilabina sa mga negosyante.

Gilakbitan sa konsehal ang sugyot sa usa ka magpapatigayon sa syudad nga mobobo sa puhunan dinha sa satellites tungod kay global community ang makabenepisyo itandi sa pagtukod og dugang mga tulay nga limitado ang makapahimulos.

Ang benepisyo niini nga proyekto moabot sa bilyones ug dako ug daghan ang kahigayonan nga maangkon sa umaabot nga mga henerasyon, dugang ni Nacaya.

Siya midugang sa sugyot usab sa usa ka telecommunications provider nga ang dakbayan maoy motukod og mga cellsite towers sama sa gipatuman sa ARMM.

Niining pamaagi mopaspas ang internet speed samtang mapaubos usab ang balayronon sa mga subscriber, sumpay sa konsehal.

Alayon niini, si Bise Mayor Rodriguez miduso sa taho ni Nacaya ngadto sa komite sa planning, research and innovation alang sa dugang pagtuon ug rekomendasyon.