Nacaya naninguha maka-establisarang dakbayan og anti cybercrime team

SI Konsehal Ian Mark Nacaya, chairman sa komite sa research and planning, nangusog nga makabaton ang dakbayan sa kaugalingon nga anti cybercrime team.

Kini ang reaksyon sa konsehal atol sa sesyon niadtong Lunes nga gidumala ni Bise Mayor Bebot Rodriguez human mi-courtesy call sa konseho ang bag-ong hepe sa Regional Anti-Crime Unit (RACU) nga si P/Lt.Col. Casan Ali.

Si Ali  mibutyag nga  ang Cagayan de Oro City Police Office (COCPO) sa pagkakaron kon hisgutan ang ekipo alang sa maong katuyuan wala gayud kini kapabilidad hinungdan nga siya misugyot  sa pag-establisar og  cybercrime team  aron  mas mapadali ang  pagtubag sa  mga reklamo kalabot  sa cybercrime.

Sumala  ni Konsehal Nacaya nga iyang nasayran   nga taas kaayo ang lista sa reklamo nga napasaka  sa buhatan sa RACU, apan iya kining nasabtan  tungod kay dili lang man ang Cagayan de Oro ang ilang ginaatiman kon dili ang tibook rehiyon.

Niini, gisugyot ni Konsehal Nacaya  sa posibleng pag-isyu og direktiba  sa  mga kagamhanan nga adunay  kapabilidad nga mo-invest  ani nga buluhaton  lakip ang listahan sa mga ekipo  ug rekisitos   aron maoy basihan sa Konseho sa ilang pagkonsiderar sa pagmugna sa maong buhatan.