NACAYA NANGUSOG MAPATUMAN DIGITAL PAYMENT SYSTEM DIHAS KAMERKADOHAN

Dako ang matabang sa katawhan ingon man sa panudlanan sa dakbayan kun mapatuman ang digital payment system dinha sa kamerkadohan.

Mao kini ang pamahayag ni Konsehal Ian Mark Nacaya, chairman sa komite sa economic enterprises, atol sa milabayng tigom, human gituki ang mga lakang nga maghatag og dugang kaarangan sa panerbisyo dinha sa mga merkado sa syudad.

Daghan ang mapanas kun walay contact ang pagbayad tali sa mga mamaligyaay sa merkado ug mga kolektor sa abangan sa mga talad ilabina ang katahap sa korapsyon, dugang sa konsehal.

Siya mipasabot nga daghan nang mga lugar ang naggamit sa modernong teknolohiya. Usa sa gitinguha sa konsehal mao ang direktang pag-remit sa renta sa mga talad gikan sa stallholder paingon sa buhatan sa City Treasurer aron wala na gayuy contact nga mahitabo.

Lakip sa gilaraw ni Nacaya nga digital payment system mao ang G-cash, Maya ug online bank payments. Gawas nga mawagtang ang mga hiwing binuhatan nga konektado sa pagdawat sa bayad mapasayon usab ang paghimo sa mga transaksyon, pamahayag ni Konsehal Ian Mark Nacaya.