Nacaya nangusog mapalambo programa pag-instalar og CCTV dihas kadalanan

Unta mapalig-on pa ang koneksyon sa na-instalar nga CCTV tali sa mga pribadong establisamento ug sa gobyerno ingon man tali sa mga barangay ug sa City Hall.

Mao kini ang unod sa taho ni Konsehal Ian Mark Nacaya atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod sa konsehal nga dakong tabang sa pagpakgang ug pagsulbad sa krimen kun konektado ang na-instalar nga mga CCTV dinha sa kadalanan ug CCTV sa mga pribadong establisamento.

Siya midugang nga adunay pipila ka mga barangay nga nag-instalar usab og CCTV sa ilang kadalanan. Kun mamugna ang programa nga makonek ang na-instalar nga mga CCTV ug makamugna ang kwerpo sa kapolisan og masterplan, dali nang matumbok ang mga lugar diin gikinahanglan mag-instalar og dugang pang CCTV.

Lakip sa gitumbok ni Nacaya mao ang pag-instalar og CCTV dinha sa mga tulay ingon man ang mga lugar diin kasagaran adunay gakahitabong krimen.

Atong kining paningkamotan nga mapatuman ug pangitaan sa igong pundo tungod kay usa kini sa mga lakang nga mapakgang ang mga panghitabo sa krimen sa dakbayan, pamahayag ni Konsehal Ian Mark Nacaya.

Ang taho ni Nacaya giduso ni Bise Mayor Rodriguez ngadto sa komite sa public order and safety ni Konsehal Romeo Calizo alang sa dugang pagtuon ug rekomendasyon.