Nacaya nahingawa sakakulangon sa tubig sa dakbayan

HUGOT nga gikahingawa ni Konsehal Ian Mark Nacaya ang padayong nasinating kakulangon sa  tubig  sa dakbayan.

Kini ang  unod sa special report sa konsehal atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Gipasabot  ni Nacaya nga  dili maayo  sa usa ka malambuong syudad nga kulang ang  supply  sa panubig tungod  dako kining epekto sa inadlaw-adlaw nga gimbuhaton  sa  katawhan.

Matod usab sa konsehal niabot na kini nga isyu sa social media nga diin miani  na og  daghang lain-laing reaksyon gikan sa katawhan nga nagpadayag sa ilang kadismaya.

Hinoon, malaumon si Konsehal Nacaya nga pinaagi sa pagtinabangay ug pagpaningkamot sa tanan mapangitaan kini  og solusyon sa labing daling panahon.