Nacaya motambong sa 7th Summit for Subnat’l Govt’s, Cities didto sa Canada

Usa si Konsehal Ian Mark Nacaya, majority floor leader sa konseho sa dakbayan, sa mga motambong sa gitakdang 7th Summit for Subnational Government and Cities didto sa Montreal, Quebec sa nasud sa Canada sa umaabot Disyembre 8-18, 2022.

Ang panagtigom nagdala sa temang “Taking Action for Biodiversity: Engage, Influence and Act” ug nunot niini mao ang pagpahigayon sa 15th Conference of the Parties (COP 15) nga pasiugdahan sa Secretariat of the Convention on Biological Diversity (SCBD), ICLEI ug Regions4.

Ang maong summit maghatag og kahigayonan alang sa bilateral meetings tali sa mga representante sa lain laing nasud. Kini gipundohan sa gobyerno sa Quebec, Canada.

Niini, ang konseho sa syudad ubos ni Bise Mayor Bebot Rodriguez misagop og resolosyon nga nagtudlo ni Nacaya nga Ambassador of Goodwill to Canada alayon sa maong pagbyahe.

Sa maong resolosyon, ang konsehal gihatagan sa katungod nga magmatikod sa mga modernong pamaagi sa lehislatura sa mga dapit nga iyang mabisitahan nga posibleng masundog dinhi sa syudad ilabina sa natad sa economic enterprises, planning and development ug mga proyekto ug programa sa agrikultura.

Ang resolosyon nga gisagop sa konseho alang sa maong katuyuan giduso ni Konsehal Romeo Calizo