Nacaya mihangyo sa kontraktor, DPWH pagpasabot sa mga residente

GIHANGYO ni  Konsehal Ian  Mark Nacaya, chairman sa komite sa research, planning and innovation sa konseho, ang kontraktor ug ang kadagkoan sa Department of Public Works and Highways (DPWH) sa pagpasabot  sa mga residente dool sa gitrabahong tulay diha sa Kalambaguhan Corner Burgos St. kinsa nakasinati sa pagkurog  sa ilang mga balay tungod sa gipahigayong pile driving.

Kini ang unod sa special repot sa konsehal sa sesyon niadtong Lunes nga gidumala ni Presiding Officer Pro Tempore Konsehal Romeo Calizo.

Sumala sa konsehal nga nabalaka ang mga residente sa ilang nasinati nga mga pagkurog  sa ilang mga gambalay nga basin maapektohan ug maguba kon ugaling motaas pa ang intensity sa maong mga pagkurog.

Hinoon, gipasabot ni Konsehal Nacaya nga dili man ipahunong ang proyekto apan angayan nga manginlabot ang kagamhanan  sa mulo sa katawhan pinaagi sa paghangyo sa kontraktor nga ipasabot lang og tarong  ngadto sa mga residente  ang mga pagkurog  nga nasinati matag karon ug unya aron nga dili usab sila mabalaka.

Giduso  sa konseho ang maong report ngadto sa komite sa public works ubos ni Konsehal Edgar Cabanlas alang sa dugang aksyon. (JRGalano/SP)