Nacaya miawhag matino tukmang doluna sa CDO

Usa sa importanteng matuki sa isyu sa doluna sa dakbayan tali sa kasikbit nga mga dapit mao ang pagkolekta sa buhis ug uban pang balayronon nga angayan sa dakbayan sa Cagayan de Oro. Mao kini ang panawagan ni Konsehal Ian Mark Nacaya atol sa sesyon sa konseho niadtong Lunes nga gidumala ni Bise Mayor Bebot Rodriguez.

Gibutyag sa konsehal ang pipila ka taho nga adunay mga molopyo nga nahimutang sa teritoryo sa dakbayan apan kasikbit sa doluna sa Iponan ug Munisipyo sa Opol ang nagbayad sa ilang buhis ug uban pang balayronon sa Opol ug sa probinsya sa Misamis Oriental.

Lakip usab niini ang nanimuyo sa Upper Puerto nga kasikbit sa Manolo Fortich nga anaa nagbayad sa ilang buhis ug ubang bayronon sa Manolo Fortich ug probinsya sa Bukidnon. Unta malakip kini sa pagahimuong pagtuki tungod kay posibleng adunay buhis ilabina sa real property tax ug balayronon sama sa business permit fees ug licenses nga angayan sa dakbayan apan nakolekta sa kasikbit nga mga munisipyo, panawagan ni Nacaya.

Ang maong sugyot ni Nacaya giduso ni Bise Mayor Bebot Rodriguez ngadto sa komite sa arbitration ni Konsehal James Judith II ug komite sa ways and means ni Konsehal George Goking alang sa makuting pagtuon ug rekomendasyon.