Nacaya miawhag matino pagpamutol og kahoy dihas Magsaysay Park

Dako ang kahingawa ni Konsehal Ian Mark Nacaya sa gikatahong pagpamutol og kahoy dinha sa Magsaysay Park. Mao kini ang gipadayag sa konsehal atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Nacaya nga ang giingong giputol nga mga kahoy na-classify nga heritage trees tungod kay giingong kapin na kini sa 50 ka tuig nganabuhi dinha sa Divisoria.

“Unsa ang plano sa designer dinha sa pagputol sa maong mga kahoy ug naa bay plano sa pagpananom og dugang mga kahoy dinha sa Magsaysay Park?”, pangutana ni Nacaya.

Niini, iyang gipasabot nga subay sa Akta Republika 10593, ang mga karaang kahoy mahimong maputol kun peligro kini sa kinabuhi sa katawhan ug sa mga kabtangan, ug kun tigulang na ang maong kahoy ug dili na makasustinar nga mabuhi pa.

Siya midugang nga angayang panalipdan ang mga kabilin kay mao kini ang magkonektar sa nangaging panahon ug sa mga kaninununoan. Ang taho ni Nacaya giduso ni Bise Mayor Bebot Rodriguez ngadto sa Komite sa Environment aron maimbentaryo ang mga heritage trees sa syudad ug matino ang plano sa kalamboan nga ipatuman dinha sa Magsaysay Park.