Nacaya mangusog mabutanga’g rainwater facilities mga mag-uuma sa dakbayan

DAKO ang panghinaut ni Konsehal Ian Mark Nacaya nga mabutangan og rainwater facilities ang mga mag-uuma sa dakbayan ilabina ang anaa sa kabukiran.

Mao kini ang panawagan sa konsehal sa sesyon sa konseho niadtong Lunes nga gidumala ni Bise Mayor Bebot Rodriguez. Iyang gipasabot nga nag-anam na ka init ang panahon ug natagamtaman na ang epekto sa El Niño phenomenon dili lang sa syudad kun dili sa tibouk nasud.

Gani, matod niya, nagbalik balik nang anaa sa 34 ngadto sa 45 degrees celsius ang temperatura sulod sa pipila na ka semana. Ug subay sa Pagasa, gilantawng moabot pa hangtod sa mga unang bulan sa 2024 ang epekto sa El Niño.

Ang labing maapektohan niini nga phenomenon mao ang mga mag-uuma ug unta mapangitaan sa tukmang lakang nga ma-instalar o’ mabutangan sa rainwater facilities o’ catch basin ang mga umahan, kabalayan ug mga institution, panawagan ni Nacaya. Siya midugang nga gikinahanglan ang pagpatuman sa mga stratehiya gikan sa buhatan sa APO, OBO ug uban pang sektor sa katilingban aron makagama og insaktong desinyo sa maong rainwater facilities nga mohaum sa bisan unsang matang sa paggamit.

Niini, siya misugyot nga mahimong makuha ang tabang gikan sa mga eksperto sa USTP dinha sa pagdesinyo sa angayang fasilidad. Ang sugyot ni Nacaya giduso ni Bise Mayor Bebot Rodriguez ngadto sa komite sa agrikultura ni Konsehal Jay Pascual alang sa dugang pagtuon.