Nacaya malaumon sa hapsay nga payout sa educ’l aid

UNTA mahapsay na ang pagtunol sa financial educational assistance dinhi sa syudad ug dili na ipalinya pa og dugay ang mga benepisaryo.

Mao kini ang paglaum ni Konsehal Ian Mark Nacaya human gipresentar ni DSWD 10 regional director ang programang gipatuman ubos sa Assistance to Individuals in Crisis Situation (AICS) –Educational Assistance/Students in Crisis.

Matod niya nga ang pagpatuman sa programa taliwala sa kakulangon sa datos nagpakita sa kahuyang sa gobyerno dinha sa pagtubag sa panginahanglanon sa katawhan.

Dili maayong palisiya ang pagpalinya ug pagpahulat sa mga benepisaryo nga dili pa seguradong makadawat sa ayuda. Unta dili nato dapiton pag-anha sa payout venue ang mga benepisaryo aron maglinya kay luoy kaayo, pamahayag ni Nacaya.

Siya mibutyag sa iyang namatikdan nga kataas sa linya atol sa milabayng payout dinha sa Sports Center nga miabot pa sa Velez Street.

Unta dili na kini mausab ug mapatuman na ang sistema nga pag-validate sa mga aplikante ug pagpadala sa notice sa petsa ug oras kanus-a moanha aron dili na malangan, panghinaut ni Konsehal Ian Mark Nacaya.