Nacaya malaumon masingil wala makolektang abangan sa mga talad

DAKO ang panghinaut ni Konsehal Ian Mark Nacaya nga makolekta na ang mga delinkwenteng abangan sa mga talad dinha sa kamerkadohan. Mao kini ang pamahayag sa konsehal sa sesyon sa konseho niadtong Martes nga gidumala ni Presiding Officer Protempore Konsehal Romeo Calizo human si Konsehal Jose Pepe Abbu Jr mitaho sa giluwatang Audit Observation Memorandum (AOM) sa Commission on Audit (CoA) kalabot sa operasyon ug kinitaan sa upat ka merkado sa syudad.

Matod niya nga dugay na ug balik balik na niyang gipanawagan ang pagkolekta sa mga delinkwenteng abangan sa mga talad sa kamerkadohan ug nalipay siya nga gitaho ni Abbu ang maong obserbasyon sa CoA tungod kay madala na sa plenaryo sa konseho ang maong butang ug mahimoan sa tukmang lakang.

Hinuon, siya mibutyag nga mipadala na sa ilang tubag ang kadagkoan sa City Economic Enterprises and Business Development Administration (CEEBDA) kanhi CEED, sa maong obserbasyon sa CoA ug gipasabot nga adunay mga angayang korehian sa computation niini.

Lakip sa gitumbok ni Nacaya mao ang computation sa renta sa merkado sa Puerto nga matod pa wala pa mahuman ang redevelopment project hinungdan nga sukay lang ang gisingil sa mga mamaligyaay sa Puerto.

Gawas pa niini, mao ang katungod sa pagkolekta sa maong mga abangan sa kamerkadohan nga nabalhin sa CEED sugod lang niadtong tuig 2017 ug sa niaging mga tuig ang gitahasan sa pagkolekta mao ang buhatan sa City Treasurer, pamahayag ni Nacaya.