Multa sa mga driver nga di morespeto sa pedestrian lanes gisugyot ni Daba

PAGPAHAMTANG og multa, pag-assign og mga traffic enforcers, pagtukod sa overpass ug pagrespeto sa mga drivers sa mga pedestrian lanes maoy pipila ka solbad sa problema sa trapiko dinhi sa syudad.

Kini ang special report ni Konsehal Suzette Magtajas Daba, Chairman sa Komite sa Edukasyon, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod sa konsehal nga adunay insidente bag-o pa lamang diin ang usa ka estudyante ang nabanggaan bisan mitabok gamit ang pedestrian lanes diha sa Uptown area.

Gipasabot ni Daba nga tungod kay daghan namang mga subdivision sa uptown area, gilaumang mosaka pud ang mga lomolopyo ug ang pagkabug-at sa dagan sa trapiko diha sa maong dapit.

Dugtong sa konsehal nga adunay pipila ka mga drivers nga dili magrespetar bisan adunay nagtabok sa mga pedestrian lanes, sama diha sa Corpus Christi ug Xavier University hinungdan nga makigpatentero nalang ang mga ginikanan, estudyante ug mga empleyado sa pagtabok.

Sa iyang pagkahibalo nga sa ubang nasud, adunay dakong penalty kon ang usa ka driver walay respeto sa mga pedestrian lanes.

Nunot niini, hugot nga gisugyot ni Daba nga unta matun-an sa hintungdang komite ang pagpahamtang og multa niadtong dili morespeto sa pedestrian lanes.

Gisugyot usab sa konsehal nga aduna gayoy traffic enforcers sa maong mga dapit aron maoy mag-asistar sa mga estudyante sa pagtabok ug kon possible, makatukod og footbridge sa maong dapit.

Ang maong taho ni Konsehal Daba giduso ni Bise Mayor Bebot Rodriguez ngadto sa Komite sa Public Utility (Roads and Traffic Management) ubos ni Konsehal Romeo Calizo alang sa tukmang rekomendasyon.