Mulo sa mga Food Panda Riders gilantawng masolusyonan

GILANTAW nga masolusyonan ang mulo sa mga food panda riders nga mabutangan og lokal nga buhatan dinhi sa syudad.

Kini human gipaabot ni Konsehal Bernie Esparcia ang maong mulo atol sa tigom sa Komite sa Labor and Employment sa miaging semana nga gidumala ni Konsehal Jose Pepe Abbu Jr. Matod ni Esparcia nga buot sa mga riders nga aduna silay maatubang nga kawani sa kompanya nga ilang madangpan kun adunay ilang problema ug reklamo ug unta dili lang ipaagi sa Food Panda app. Gidugang sa konsehal nga walay mapangutan-an o maduolan ang mga riders sa ilang problema ug reklamo kay walay direkta nga makatubag kanila ilabina kun sila masuspende.

Hinoon, gipasabot sa representante sa Food Panda nga panahon sa pandemya aduna sila’y lokal nga buhatan apan pinaagi sa usa ka direktiba giwagtang kini tungod kay naka-centralize na ang system ug usab aduna sila’y link o facebook page diin didto mapaabot ang mga pangutana ug hangyo sa katin-awan sa ilang mga mulo.

Malaumon si Esparcia nga masolosyonan sa kompanya sa Food Panda ang hangyo sa ilang mga riders.