Ms CdO 2023 ipresentar ugmang adlawa sa publiko

Ipresentar ugmang adlawa ang mga kandidata sa Miss Cagayan de Oro 2023 diha sa Activity Center, Centrio Ayala Mall, ning syudad.

Kini human nahibaloan ni Konsehal Jay Roa Pascual, chairman sa Komite sa Turismo, nga gitakda na ugmang adlawa ang press and public presentation sa napulo’g duha ka kandidata nga nangandoy makuha ang titulong Miss Cagayan de Oro 2023.

Ang Miss Cagayan de Oro 2023 ang usa sa mga pasundayag pahaom sa kasaulogan sa tinuig nga kapistahan ni Sr. San Augustine sa dakbayan sa Cagayan de Oro. Gibutyag ni Pascual nga talagsaon kini nga kahigayonan aron mapasundayag ang tagsa-tagsa ka talento, katahum ug abilidad nga magdala kanila sa kaligdong ug paghatag og gahum sa kababaehan.

Niini, gidasig ni Pascual ang mga Kagay-anon sa pagsuporta dili lamang sa pagsaksi sa maong pageant kun dili pagsalmot sa mga nakahan-ay nga kalihokan pahaom sa kapistahan sa syudad.