MP brgy hall, covered court canal sa Baikingon matul-id

LIMA ka mga proyekto sa imprastraktura sa Barangay Baikingon ang gipaabot mapatuman karong tuiga. Kini human ang Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang balor P5,614,218.00 nga annual budget.

Niini, balor P833,949.00 ang gigahin alang sa 20% development fund aron gamiton sa ilang napiling mga proyekto sa imprastrukta nga naglakip sa pagtul-id sa Multi-Purpose Barangay Hall, covered court kanal, ug barangay tanod outpost ingon man proyekto pag-instalar og solar lights sa kadalanan, pagpahimutang og line canal sa health center ug waiting area, ug pag-instalar sa CCTV sa ilang barangay.

Gipundohan usab sa barangay balor P280 mil ang ilang disaster preparedness, prevention and mitigation response program. Niini, gilantaw ang pagpalit sa mga ekipo nga magamit panahon sa kalamidad.

Samtang 10 porsyentong pundo balor P561 mil ang gigahin alang sa pagpatuman sa mga programa sa Sangguniang Kabataan.

Ang budget sa Baikingon miagi sa makuting pagtuon sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.