Esparcia uyon sa operasyon sa Move It

Dakong uyon si Konsehal Bernie Esparcia sa laraw sa kompanyang Move It, usa ka Motorcycle Taxi Company, nga mag-operate dinhi sa syudad.

Sa milabayng tigom sa Komite sa Public Utilities nga gidumala ni Konsehal Romeo Calizo, and Land Transportation Franchising and Regulatory Board (LTFRB), Land Transportation Office (LTO), Roads and Traffic Administration (RTA), ug ubang nalambigit nga buhatan sa operasyon sa kompanya, mipadayag sa ilang pag-uyon sa maong aplikasyon sa Move It.

Niini, si Esparcia mibutyag sa iyang pag- uyon sa operasyon tungod kay iyang nakita nga bintaha kini kun itandi sa mga habal-habal, kay dayag ang detalye sa mga riders diha sa ilang app maong dali ra usab nga mapaabot ang reklamo sa mga pasahero.

“Dili kini susama sa mga habal-habal o’ sa pipila nga gapamasahero nga dili makita ang hitsura sa rider ug makalolooy pa ang pasahero kun maatlan nga ang masakyan tulisan o’ dautang elemento”, dugang sa konsehal.

Niini, ang komite misagop sa resolusyon nga nagpadayag sa walay pagsupak sa aplikasyon sa Move It ug miduso niini ngadtosa Komite Pamalaod ni Konsehal Edgar Cabanlas alang sa dugang pagtuon ug rekomendasyon.