MoU tali TFP, Inc. giaprobahan sa konseho

GILANTAWNG mapalapdan pa ang natad sa edukasyon sa kabataan sa duha ka mga barangay sa dakbayan.

Kini human hiniusang giuyonan sa konseho sa special session niadtong Huwebes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy sa pagpirma sa Memorandum of Understanding (MoU) uban sa Teach for the Philippines, (TFP) Inc. alang sa pagpatuman sa Teach for the Philippines Fellowship Program alang sa School Year 2024-2025 ug 2025-2026.

Kini naglangkob sa duha ka tuig nga programa sa pagbansay ug paghatag og dugang kalamboan sa edukasyon pinaagi sa pagserbisyo isip Teacher Fellows nga magtudlo diha sa West City Central ug Taguanao Elementary School.

Ang ordinansa nga gipalabang sa konseho alang sa maong katuyoan gipaluyohan sa Komite sa Edukasyon ni Konsehal Suzette Magtajas-Daba ug Komite sa Pamalaod ug Reglamento ni Konsehal Edgar Cabanlas.