Motorcycle taxi operation sa Taxsee Philippines giindorsar sa Konseho

HAYAN mahatagan sa dugang kasayon sa pagpanakayan ang katawhan sa dakbayan.

Kini human gisagop sa Konseho sa sesyon niadtong Lunes nga gidumala ni Bise Mayor Bebot Rodriguez ang resolusyon nga nag-endorsar sa Cagayan de Oro Taxsee Philippines, Inc (Maxim Rides and Food Delivery-Cagayan de Oro City) alang sa ilang motorcycle taxi operation.

Nasayran nga ang maong kompanya  adunay akreditasyon sa Land Transportation Franchising Regulatory Board (LTFRB) ug naninguha nga  makaserbisyo sa publiko pinaagi sa ilang luwas, ekonomikanhon  ug accessible nga klase sa transportasyon.

Sa kasayuran nga nahipos, ang Maxim mipaubos usab sa pilot study aron pagsiguro  sa kaluwasan sa two-wheel vehicles nga gamiton sa  transportasyon nga gidumala sa  Motor Taxi –Technical  Working Group (TWG) ubos sa superbisyon sa  LFTRB ug DOTR.

Ang resolusyon nga gisagop sa konseho alang sa maong katuyuan  gipaluyuhan sa Komite sa Public Utilities ni Konsehal Romeo Calizo ug Komite sa Pamalaod  ni Konsehal Edgar Cabanlas.