Moreno nangusog maprotektahan panginabuhi sa PUJ operators

Kinahanglang dili mahikawan sa ilang kapanginabuhian ang mga gagmayng operators sa pampublikong sakyanan dinhi sa dakbayan.

Mao kini ang gihingusgan ni Konsehal Imee Moreno atol sa sesyon sa konseho niadtong Lunes nga gidumala ni Bise Mayor Bebot Rodriguez.

Sa maong higayon iyang gibutyag nga naaprobahan na sa LTFRB ang Local Public Transport Route Plan (LPTRP) sa dakbayan sa Cagayan de Oro agig pagpatuman sa Public Utility Vehicle Modernization Program (PUVMP).

Matod niya nga midangop kaniya ang mga local transport operators ug gagmayng transport cooperatives sa tinguha matabangan nga makapahimulos sa bank financing ug maseguro nga dili mahatag sa lain ang ilang mga kasamtangang prankisa aron padayon nga makapanginabuhi.

Gani, ang Oro Transport Cooperative milusad kagahapon sa ilang bag-ong napalit nga 15 ka units sa modernized jeepney apan adunay kabalaka nga basin dili makabayad sa ilang binulang amortization kun dili mahatag kanila ang prankisa sa rutang kasamtangang gibyahian, dugang ni Moreno.

Samtang wala pa mahatag kanila ang ilang mga prankisa, padayon ang ilang kabalaka nga mahatag sa mga dagkong transport operators ang ilang mga prankisa, sumpay sa konsehal.

Siya midugang nga angayang magmabinatayon ang tanan dinha sa pagproteher sa mga gagmayng transport operators ilabina dinha sa pag-avail sa financing program sa mga government banks ug pag-renew sa ilang mga prankisa.

Atong itunol ang tanang matang sa pag-abag kanila aron hingpit nga masunod ang nakalatid sa balaod sa PUVMP nga dili sila mahikawan sa ilang kinitaan, panapos ni Moreno.

Ang maong taho giduso ni Bise Mayor Rodriguez ngadto sa komite sa public utilities, energy and roads and traffic management ni Konsehal Romeo Calizo uban sa komite sa kooperatiba ni Konsehal Moreno alang sa pagpahigayon og pakisusi ug rekomendasyon.