Moreno misuporta pag-amendar sa Oro Youth Code

Kusganong gisuportahan ni Konsehal Imee Moreno ang sugyot pag-amendar sa Oro Youth Code sa tinguha nga makamugna og saktong programa alang sa paugnat sa kusog sa kabataan sa syudad.

Sa miaging tigom sa Komite sa Sports and Youth Development ni Konsehal John Michael Seno, gipasabot sa konsehala nga daghan nang mga Kagay-anong atleta nga nanghawod sa ilang mga piniling paugnat sa kusog ug gani nahimong mga iskolar sa lain laing tunghaan sa tibuok nasud.

Nasayran sa konsehal nga kadto lang adunay pinansyal nga kapasidad ang makaapil og sports camps ug sila lang ang mahatagan sa kahigayonan nga mamahimong iskolar sa mga dagkong kolehiyo ug unibersidad ug makapadayon sa ilang pagtungha.

Matud niya, “Importante gyud kaayo nga aduna kitay saktong sports program sa ingon mamintinar ang programa tungod kay usa kini sa mga holistic nga pamaagi aron mahatagan sa kahigayonan ang daghang kabataan nga mapalambo ug mabansay ang kahanas sa mapiling paugnat sa kusog.”

Sa iyang bahin, si Konsehal Yvy Emano misugyot nga unta malakip sa programa sa paugnat sa kusog ang mga larong pinoy sama sa sipak takraw, patentero ug uban pa. Siya mipasabot nga gamay ra ang gikinahanglang pundo sa maong mga dula ug angayang mapadayon ang kulturang Pinoy ug ang kayano sa mga karaang pamaagi sa dula.

Samtang si Konsehal Aga Suan misugyot sa pagmugna sa saktong programa sa paugnat sa kusog aron adunay kapilian ang mga tinun-an nga mahiligon sa sports.