Moreno misugyot og dugang serbisyo ngadto’s PWDs

Unta dili lang social pension ang dugang serbisyo nga matunol sa kagamhanan sa dakbayan ngadto sa mga molopyong adunay kabilinggan sa panglawas.

Mao kini ang gisugyot ni Konsehal Imee Moreno sa gidusong sugyot ni Konsehal Girlie Balaba kalabot sa pagtunol og social pension sa mga kabus nga Persons with Disabilities (PWDs) sa syudad atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Moreno nga iyang nasaksihan sa Quezon City nga aduna gayud silay facilidad sama sa community center alang sa gipatumang suporta ngadto sa mga PWDs. Kini, gawas pa sa mga programang gipatuman aron mapalambo ang kinabuhi sa matag molopyo nga adunay kabilinggan sa panglawas.

Ako malaumon nga sama sa Quezon City, mapalapdan pa sa Cagayan de Oro ang gitunol nga mga proyekto ug programa alang sa dugang kaarangan sa matag Kagay-anong PWDs ilabina ang mga kabus, panghinaut ni Konsehal Imee Moreno.