Moreno malaumon hydro project makatabang sa tanang Kagay-anon

Gikinahanglang makita ang tanang gusto natong kahigayonan o’ pilion ang labing maayong oportunidad alang sa katawhan sa dakbayan.

Kini ang pamahayag ni Konsehal Imee Moreno atol sa hiniusang tigom sa komite sa Public Utilities, Energy and Transportation; Environment; Agriculture, Fisheries and Cultural Communities; Tourism ug Health, Nutrition and Health Insurance human gihisgutan ang pagtukod sa Bulanog-Batang Hydro project diha sa barangay Besigan.

Ang konsehal mipadayag sa iyang suporta sa proyekto kun maghatag kini sa maayong kahigayonan dili lang sa katawhan sa barangay Besigan ug Tignapoloan kun dili sa kinatibuk-ang katawhan sa dakbayan sa Cagayan de Oro.

Siya miingon nga makatabang ang proyekto sa katawhan human nadungog ang panahom sa mga kapitan sa barangay Besigan ug Tignapoloan kalabot sa kamahinungdanon sa proyekto tungod kay mahatagan og prayoridad sa panarbaho ang ilang mga molopyo ilabina ang mga lumad sa dapit.

Apan, gikahingawa ni Moreno ang sentimento nga gipadayag sa representante sa Water Rafting Association nga matod pa makaapekto sa ilang kalihokan sa water rafting. Gani gitawag na ang Cagayan de Oro Water Rafting nga rafting capital sa nasud ug usa sa mga nag-unang kalihokan sa mga turista sa syudad.

Sa pagpatuman sa proyekto unta dili usab mahikawan sa kapanginabuhian ang atong mga raftors aron walay mapihig nga Kagay-anon dinha sa pag-angkon sa dugang kaarangan sa kinabuhi, panapos ni Konsehal Imee Moreno.