MOA tali sa kagamhanan, 4ID kalabot pag-establisar sa TFO giuyonan sa Konseho

LABING mapalapdan pa ang kampanya sa kahusay ug kalinaw sa dakbayan  sa pagsiguro  nga mahimong luwas ug malinawon ang pagpamuyo   sa katawhan  ingon man sa seguridad sa mga magpapatigayon.

Kini human ang Konseho sa sesyon niaadtong Lunes nga gidumala ni Bise Mayor Bebot Rodriguez mipalabang og ordinansa nga naghatag panugot ni Mayor Rolando Uy pagpirma sa Amended Memoramdum of Agreement (MoA) tali sa 4th Infantry Division kalabot sa pag-establisar og Task Force Oro (TFO).

Ubos sa kasabutan, ang lokal nga kagamhanan mopalabang  og balaodnon kon gikinahanglan  alang sa epektibong  implementasyon sa gimandong tahas sa Task Force Oro lakip niini nga matugotan 4ID Philippine Army sa paggamit sa personnel, manpower, ekipos ug facilidad  sa syudad.

Dugtong niini, ang kagamhanan maoy mohatag sa mga technical ug operational nga panginahanglan sa 4ID diha sa pagpatuman sa mga kalihukan sa Task Force ubos sa giya nga gisitar sa balaod ug uban pa.

Samtang sa laing bahin, ang 4ID morekomendar og tukmang og balaodnon ngadto sa mayor aron sugpoon ang mga kagubot ingon man ang pag-aresto sa mga nakasupak sa balaod, mopahigayon og mga operasyon batok sa kaguliyang ug uban pang matang sa terorismo.

Ang ordinansa nga gipalabang alang sa maong katuyoan  gipaluyohan sa Komite sa Public Order and Safety ubos ni Konsehal Romeo Calizo ug Komite sa Pamalaod ug Reglamento ni Konsehal Edgar Cabanlas.