MoA tali’s CDO, DOST-PHILVOCS giuyonan sa Konseho

Intensity Meter mainstalar sa City Hall.

Gilantaw nga makakolekta na sa gikinahanglang datos nga magamit sa pagkuha sa tukmang oras ug epekto sa linog. Kini human ang Konseho sa Syudad sa sesyon niadtong Lunes nga gidumala ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Department of Science and Technology-Philippine Institute of Volcanology and Seismology (DOST-PHILVOCS). Kini alang sa kolabo-rasyon sa duha ka ahensya sa gobyerno pag-instalar og Intensity Meter dinha sa City Hall Building.

Ubos sa MoA, ang DOST-PHILVOCS maoy mopahimutang sa nahisgutang intensity meter, mokuha sa impormasyon sa linog nga anaa sa web portal nga ma-access sa syudad, maghatag og kapasegurohan nga ang tanang kahimanan dili peligro alang sa tawo ug sa palibot, moabaga sa mga galastohon alang sa pag-instalar sa ekipo, ug uban pang gikinahanglan alang sa proyekto.

Samtang ang kagamhanan sa dakbayan maghatag og panugot ngadto DOST-PHILVOCS pag-instalar sa ekipo nga libre sa tanang gastos, sama sa elektrisidad ug koneksyon sa internet, maghatag og access sa Intensity Meter atol sa regular nga pagbisita, dili pagbalhin sa ekipo sa laing lugar gawas kun giuyonan, makigtambayayong sa DOST-PHILVOCS nga luwas ang mga ekipo sa tanang panahon, ug uban pa. Nasayran nga ang DOST-PHILVOCS ang gitahasan sa pagpangandam aron makunhoran ang epekto sa katalagman dala sa linog.

Ang ordinansa nga gipalabang sa konseho alang sa maong katuyuan gipaluyohan sa Komite sa Climate Change Adaptation and Mitigation and Disaster Risk Reduction ni Konsehal Bernie Esparcia ug Komite sa Pamalaod ni Konsehal Edgar Cabanlas.