MOA sa paggamit sa eskwelahan isip temporaryong evacuation centers giuyonan

MAHIMO nang gamiton ang mga eskwelahan isip temporaryong evacuation centers.

Kini human paborableng giuyonan sa Konseho atol sa regular sesyon sa Lunes, nga gidumala  ni Bise Mayor Bebot Rodriguez ang ordinansa nga naghatag katungod ni Mayor Klarex Uy sa pagpirma sa Memorandum of Agreement (MOA) tali sa Department of Education Division sa Cagayan de Oro City (DepEd-CDO), nga girepresentahan ni Schools Division Superintendent, Dr. Roy Angelo E. Gazo.

Ang MOA naglangkob sa kolaborasyon alang sa paggamit sa mga eskwelahan o child development centers isip temporary evacuation centers alang sa mga pamilya ug mga tawo nga apektado sa mga kalamidad.

Subay sa DepEd Order No. 33, s. 2021, nga nag-ulohan “school-based disaster preparedness and response measures”, ang DepEd-CDO motugot sa siyudad sa paggamit sa ilang mga eskwelahan isip temporaryo nga evacuation center alang niadtong apektado sa kalamidad.

Samtang ang Siyudad kinahanglan magpahigayon sa general cleaning, fumigation, pagbayad sa mga utilities, ug pag-ayo sa mga eskwelahan nga gigamit isip evacuation center ug kinahanglan masiguro nga ang tanang safety ug security measures masunod atol sa pagpangandam alang sa aktuwal nga pagpatuman niini. (RNQuiblat/SP)