MOA sa Alternative Learning System-Night School Program aprobado sa konseho

DUGANG malahutayong kalamboan sa natad sa edukasyon ang gipaabot nga matagamtaman sa mga out-of-school youth (OSY) ug adults-at-risk dinhi sa Dakbayan sa Cagayan de Oro.

Kini human ang Konseho sa Syudad atol sa regular sesyon niadtong Lunes nga gidumala ni City Vice Mayor Bebot Rodriguez mipalabang og ordinansa nga naghatag katungod ni City Mayor Klarex Uy pagpirma sa Memorandum of Agreement (MOA) tali sa University of Science and Technology of Southern Philippines (USTP), nga girepresentahan sa System President, Dr. Ambrosio B. Cultura II ug Department of Education-Division of Cagayan de Oro (DepEd-CDO), nga girepresentahan ni Schools Division Superintendent, Dr. Roy Angelo E. Gazo, CESO V.

Kini naglangkob sa panagtambayayong sa pagpatuman sa Alternative Learning System-Night School Program (ALS-NSP) alang sa out-of-school youth (OSY) ug adults-at-risk sa Syudad.

Giisip nga ang OSY ug ang adults-at-risk mao ang mga vulnerable nga grupo nga gikinahanglang mahatagan og oportunidad sama sa batakang edukasyon, literacy, numeracy ug values formation nga makapahimo kanila nga kabahin sa sa malungtarong kalamboan.

Kini nga kolaborasyon nahiuyon sa RISE agenda sa kagamhanan sa siyudad, nga nagpasiugda sa edukasyon isip usa ka mahinungdanong himan alang sa kalamboan sa matag usa.