MOA pagrehabilitar sa bakhawan sa Bonbon giaprobahan

HAYAN molambo ug labing modaghan ang tanom nga mga bakhaw diha sa barangay Bonbon ning syudad.

Kini human ang konseho sa sesyon niadtong Lunes nga gidumala ni Bise Mayor Kikang Uy mipalabang sa ordinansa nga naghatag katungod ni Mayor Oscar Moreno pagpirma sa Memorandum of Agreement (MoA) tali sa kagamhanan sa syudad, Xavier

University –Ateneo de Cagayan pinaagi sa Mckeough Marine Center, Sari –Sari Fishermen Association (SSFA) ug lokal nga kagamhanan sa Barangay Bonbon.

Ubos sa maong kasabutan gipalapdan ang kapasidad sa People’s Organization sa pagrehabilitar sa bakhawan sa barangay Bonbon ubos sa Macajalar Bay Project subay sa nahilatid sa MoA.

Nasayran ang bakhaw dako og ikatabang pagdepensa labina sa panahon nga adunay bagyo ug dagkong balod tungod nagsilbi kining pinuy-an sa mga organismo sa kadagatan.

Si Konsehal Eric Salcedo, chairman sa komite sa Environment and Natural Resources malaumon nga pinaagi sa maong lakang mapalambo ug mapreserbar ang bakhawan sa dapit nga dako og ikatabang diha sa pagprotektar sa mga organismo sa kadagatan ingon man sa coastal community.

Ang ordinansa nga gipalabang sa konseho alang sa maong katuyuan gipaluyuhan sa komite sa Environment ubos ni Konsehal Eric Salcedo ug komite sa pamalaod ug reglamento ni Konsehal Ian Mark Nacaya.