MoA magpatuman sa Baikingon Riverbank Rehab Project konsiderahon sa konseho

Konsiderahon sa konseho sa syudad ubos ni Bise Mayor Jocelyn Rodriguez ang hangyo ni Mayor Rolando Uy nga mahatagan sa katungod pagpirma sa Memorandum of Agreement (MoA) tali sa Bureau of Jail Management and Penology –Cagayan de Oro Jail Male Dormitory, konseho sa Barangay Baikingon ug Patingtingan Integrated Social Forestry Farmers Association (PISFFA). Kini kabahin sa pagpatuman sa Riverbank Rehabilitation Project diha sa Baikingon nga gitumong aron maprotektahan ang katungod sa mga Pilipino alang balanse ug himsog nga ekolohiya.

Sa maong sugyot MoA, ang kagamhanan sa syudad pinaagi sa City Local Environment and Natural Resources Office (CLENRO) gitahasan sa pagpatuman sa angayang mga lakang alang sa malahutayong pagdumala ug pagpalambo sa kinaiyahan sulod sa nahisakopan ingon man ang pagkuha sa kooperasyon sa pakiglambigit ug partisipasyon sa tanang sektor sa katilingban.

Sa maong kasabutan, ang konseho sa Baikingon ug mga sakop sa PISFFA mao ang mosuporta sa paningkamot pagrehabilitar, pagkonserba ug pagproteher sa dapit aron mapanumbalik ang kahimsog sa kinaiyahan samtang ang dakbayan mao ang maghikay sa planting sites aron pagsiguro nga mabuhi ang mga ipangtanom.

Ang maong MoA giduso ngadto sa komite sa environment ni Konsehal Roger Abaday alang sa dugang pagtuon ug rekomendasyon.