MOA alang sa technical scholarship giuyonan

Gilantaw nga mahatagan og dugang kalamboan ang katawhan sa dakbayan sa Cagayan de Oro. Kini human giuyunan sa konseho sa syudad sa sesyon sa miaging Lunes nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Gonzalo and Carmen Abaya Memorial Foundation, Inc. (G-CAMFI).

Kini naglangkob sa kolaborasyon sa pag-implementar sa technical vocational scholarship program alang sa tanang kwalipikadong benipisaryo. Tumong sa kasabotan nga mahatagan og scholarship kadtong kabataan nga anaa sa ubos nga hut-ong sa komunidad.

Ubos sa MoA, ang GCAMFI ang mag-ila sa 10 ka benipisaryo kada-quarter sa tuig ug mag-endorso aron ma-enroll ngadto sa CdO-TVI ug maghatag og adlaw-adlaw nga allowance ug uban pa.

Sa laing bahin, ang dakbayan mao ang mokompirma sa gi-indorso nga kwalipikadong indibidwal sa pagbansay ug masiguro ang paghatag sa de kalidad nga edukasyon ug ang programa sa pagbansay, magdesignate og Training Coordinator alang sa maong programa, ug uban pa.