MOA alang sa GUGMA communal garden giuyonan sa Konseho

GILANTAW nga mahatagan og dugang kaarangan sa panginabuhian ang katawhan sa dakbayan. Kini human ang Konseho sa Syudad sa sesyon niadtong Lunes nga gidumala ni  Bise Mayor Bebot Rodriguez mipalabang sa ordinansa nga naghatag katungod ni Mayor Rolando “Klarex” Uy pagpirma sa Memorandum of Agreement (MoA)  tali sa Department of Agriculture  (DA) alang pagmugna og Go Urban Gardening: Making Food Available (GUGMA).

Sa maong kasabotan,  ang  kagamhanan sa dakbayan maoy  moimplemantar sa programa sa Urban Agriculture (UA) sa DA pinaagi sa Agricultural Training Institute (ATI) -Regional Training Center10 duyog sa pagsuporta sa National Urban and Peri-Urban Agriculture Program (NUPAP) sa tinguha nga matubag ang panginahanglanon sa suplay sa pagkaon ug  maminusan ang kapobrehon  sa komunidad.

Sa laing bahin, ang DA  mao ang  mohatag og seedling tray, polyethylene bags ug  similya nga haum sa usa ka lugar  aron makasugod sa ilang kaugalingong  container o backyard garden, paghimo og regular nga pagmonitor sa garden ug uban pa.

Samtang ang kagamhanan mao  ang  maghatag sa lugar nga gamiton  sa GUGMA communal garden ingon man pag-promote niini ngadto sa katawhan, magtabang sa pagmonitor sa sistema sa DA-ATI, mag-assign og modumala sa garden, pagsiguro  nga molahotay ang  proyekto pinaagi sa paghatag sa gikinihanglang suplay ug uban pa.

Ang ordinansa nga  gipalabang sa Konseho alang sa maong katuyoan  gipaluyohan sa Komite sa Agriculture ni Konsehal Jay Pascual ug Komite sa Pamalaod ni Konsehal Edgar Cabanlas.