Mga proyekto sa DPWH angayan mapahibalo ang kagamhanang local - Ocon

SUBAY sa nahilatid sa bala-od, ang mga proyekto nga e-implementar nga iya sa nasudnong pangagamhanan sama sa Department of Public Work and Highways (DPWH) kinahanglan nga ikoordinar o ipahibalo sa local nga kagamhanan.

Kini ang reaksyon ni Konsehal Zaldy O. Ocon sa gipadangat nga special report ni Konsehal Roger Abaday atol sa sesyon ni-adtong Lunes nga gidumala ni Bise Mayor Kikang Uy.

Sumala ni Ocon nga sagad sa gakahitabo sa mga gipatuman nga proyekto sa DPWH nga walay koordinasyon sa kagamhanang lokal nga kun aduna nay mga problema sa proyekto lakip na dayon ang syudad sa problema,” sumpay ni Ocon.

Nagtoo si Ocon nga kun aduna lay insaktong koordinasyon mahimong hapsay ang pag-implementar sa mga proyekto sa DPWH dinhi sa syudad kay malingkuran ug matuki man ang angayan ipatuman.

Gipasabot ni Ocon nga ang wala pagtuman sa gabayan klaro kining paglapas bala-od ug angayan kining hatagan sa igong pagtagad ug pahamtangan sa tukmang silot o multa subay sa balaod.

Niini naghanyo si Ocon nga unta hugot nga ipatuman ang insaktong koordinasyon tungod ug alang sa maayong pagpatuman sa mga proyekto alang sa kaayuhan ug kalambu-an sa kinabag-an.