Mga proyekto sa Brgy Iponan mapatuman na

UNOM ka dagkong proyekto sa Barangay Iponan ang mapatuman ning nahabiling panahon sa tuig 2023.

Kini human ang Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa Iponan diin nasukip ang ilang Annual Budget nga adunay gibana-banang kinitaan ug galastohon balor P29,522,412.00.

Lakip sa mapatuman mao ang proyekto pagsemento sa alleys apil na pagtul-id sa mga kanal balor P1 ka milyon, pagtukod sa koral sa CDORSHP-3 Iponan National High School balor P751,807.00, pag-instalar og suga sa kadalanan balor P750 mil, pagpalit og sports equipment para sa barangay wide sports programs balor 593 mil, ug pagrehabilitar sa Multi-purpose Hall building balor P367 mil.

Dugang niini, gigahinan usab sa barangay og igong pondo ang pagtul-id sa upat ka child development centers ug tulo ka pampulikong tunghaan, pagtukod og buhatan sa Barangay Disaster Risk Reduction Management (BDRRM), pagtukod og temporaryong pinuy-anan sa mga biktima sa pang-abuso, pagtukod og student/parents lounge sa Iponan Elementary School, pagtukod og main gate sa Iponan National High School ug pagrehabilitar sa kadalanan sa barangay.

Ang resolusyonnga gipalabang sa konseho alang sa maong katuyuan gipaluyuhan sa Komite sa Barangay affairs ni Konsehal Yan Lam S. Lim ug Komite sa Pamalaod ni Konsehal Edgar Cabanlas.