Mga proyekto, programa sa Barangay 22 maimplementar na

MAPATUMAN  na ang mga programa ug proyekto sa Barangay No. 22  nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P6,517,494.00.

Lakip sa gipundohan mao ang ilang 20 porsyentong balor P970,452.00; samtang P325,875.00 alang sa Calamity Fund ug P651,749.00 alang sa pagpatuman sa mga programa ug proyekto sa Sangguniang Kabataan (SK); P450,000.00 alang sa pag-instalar sa Street Lighting Facilities ug uban pang mga programa nga gilantawng maghatag kaarangan sa ilang pagserbisyo ngadto sa katawhan.

Ang 2024 annual budget sa maong barangay miagi sa makuting pagtuon sa mga hintundang komite sa konseho ug nasuta nga nahiuyon sa balaod ug mahimo nang mapatuman sa labing daling panahon.

Ang resolusyon nga gipalabang sa konseho alang sa maong katoyuan  gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.