Mga proyekto, programa sa Barangay 17 mapatuman na

HINGPIT nang mapatuman sa Barangay 17 ang ilang mga gihan-ay nga mga programa ug proyekto nga gipundohan karong tuiga.

Kini human ang Konseho sa Syudad, sa milabayng sesyon nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P4,861,029.00.

Lakip sa gipundohan mao ang 20% Development Fund balor P1,460,372.00 samtang P486,103.00 ang gigahin alang sa pagpatuman sa mga programa ug proyekto sa Sangguniang Kabataan; P390,000.00 alang sa flood control ug declogging sa mga canals P341,218.00 pag-instalar sa mga street lights sa maong barangay ug uban pang mga programa nga gilantawng makatunol ug dugang kaarangan sa ilang pag-serbisyo ngadto sa katawhan.

Ang 2024 Annual Budget sa Barangay 17 miagi sa makuting pagtuon sa mga komite sa konseho ug nasuta nga haom ug nahiuyon sa balaod ug mahimo nang mapatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.