Mga programa ug proyekto sa Tablon mapatuman na

Hiniusang giaprobahan sa konseho sa syudad sa sesyon niadtong Lunes nga gidumala ni Konsehal Edna Dahino ang resolusyon nga nag-uli sa ordinansa sa barangay Tablon.

Kini may kalabutan sa ilang 2021 Annual Budget nga adunay gibana banang kinitaan ug galastohon balor P36,093,331.

Lakip sa gipundohan sa barangay sa maong budget ang pagtukod og hanging bridge, pagtukod og drainage , pagrehabilitar sa ilang Material Recovery Facilities ug pagutukod og edipisyo alang sa multi-purpose.

Sa laing bahin, migahin usab ang barangay og igong pundo alang sa mga programa sa kabatan-onan, pagpalit og mga supplies nga magamit panahon sa kalamidad ug uban pang proyekto nga gilantaw'ng maghatag dugang kaarangan sa ilang dapit.

Si Konsehal Yan Lam Lim, chairman sa komite sa Barangay Affairs mipasabot nga iyang gipaluyohan ang maong lakang kay dako kinig ikatabang sa kalamboan ug kaarangan sa katawhan sa Tablon.

Ang resolusyon nga gipalabang sa konseho alang sa maong katuyoan gipaluyohan sa komite sa Barangay Affairs ni Konsehal Lim ug komite sa palamaod ug reglamento ubos ni konsehal Ian Mark Nacaya.