Mga programa ug proyekto sa Brgy. Bayabas mapatuman na

HINGPIT nang matagamtaman sa katawhan sa Barangay Bayabas ning syudad ang kaarangan ug kalamboan sa ilang dapit.

Kini tungod kay ang konseho sa sesyon niadtong Martes nga gidumala ni Bise Mayor Kikang Uy mipalabang sa resolusyon nga nag-uli sa ordinansa sa barangay nga may kalabotan sa ilang 2021 Annual Budget nga adunay gibana banang gahin ug

galastohon balor P14,154,383.

Lakip sa gihatagan prayoridad sa barangay ubos sa maong budget ang pag-establisar sa Manpower Development Center, pag-instalar og suga sa kadalanan ug pagrehabilitar sa

ilang multi-purpose hall ug barangay health center.

Migahin usab ang barangay alang sa pagtukod og multi-purpose hall dihas Sitio Sta. Cruz sa Purok 4, pag-abli og dalan sa pipila ka Sitio, pagrehabilitar og Footbridge sa Sitio Palawan ug uban pang dagkong proyekto nga maghatag og kaarangan sa kinabuhi sa katawhan.

Si Konsehal Yan Lam Lim, chairman sa komite sa Barangay Affairs mibutyag nga ang maong lakang miagi sa makuting pagtuon ug deliberasyon sa hintungdang mga komite ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa Barangay Affairs ni Konsehal Lim ug komite sa pamalaod ug reglamento ubos ni Konsehal Ian Mark Nacaya.