Mga programa ug proyekto sa Barangay 4 mapatuman na

Hingpit nang mapatuman sa Barangay 4 ang ilang mga programa ug proyekto nga gipundohan karong tuiga.

Kini human ang konseho sa syudad sa sesyon niadtong Lunes nga gidumala ni bise mayor Kikang Uy misagop sa resolusyon nga nag-uli sa ordinansa diin nasukip ang 2021 Annual Budget sa barangay balor P2,558,295.

Lakip sa gipundohan sa barangay mao ang flood control-declogging of canals ug rehabilitation sa drainage system.

Migahin usab ang barangay og pundo alang sa pagpatuman sa mga programa nga giandam alang sa mga kabatan-onan, pagpalit og mga materyales nga magamit panahon sa kalamidad ug uban pang mga programa alang sa dugang kalamboan sa barangay.

Ang maong lakang miagi sa makuting pakisusi og deliberasyon sa mga hintungdang komite sa konseho ug nasuta nga nahisubay sa balaod ug mahimo na kining ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni konsehal Yan Lam Lim ug komite sa pamalaod ni konsehal Ian Mark Nacaya.