Mga programa sa SK sa Brgy 19, Taglimao mapatuman na

MAPATUMAN na sa hingpit sa mga opisyal sa Sangguniang Kabataan (SK) sa duha ka mga barangay ning syudad ang ilang mga programa ug proyekto nga gilantaw’ng maghatag og dugang kaarangan sa sektor sa kabatan-onan.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa duha ka mga resolosyon nga nag-uli sa gipasakang resolosyon sa Barangay No. 19 ug Taglimao diin nasukip ang ilang SK 2022 Annual Budget.

Giuyonan sa konseho ang gibanabanang kinitaan ug galastohon balor P551,631.00 alang sa Barangay No. 19 ug P429,416.00 sa Barangay Taglimao.

Sa duha ka barangay, gigahinan sa maong pundo ang pagpatuman sa mga programa ug proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Lakip niini mao ang programa sa edukasyon ilabina ang paghatag og dugang kahibalo sa kabataan sa natad sa panglawas, pagproteher sa kinaiyahan, youth employment and livelihood, capability building ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga mga resolosyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa dugang kalamboan sa mga kabatan-onan.

Ang resolosyon nga gipalabang sa konseho alang sa maong katuyuan gipaluyuhan sa komite sa pamalaod ni Konsehal Ian Mark Nacaya.