Mga programa sa SK Dansolihon, mapatuman na

PINAAGI sa usa ka resolusyon nga gipalabang sa konseho sa dakbayan, hingpit nang mapatuman sa Sangguniang Kabataan (SK) sa Barangay Dansolihon ang ilang mga programa ug proyekto nga gipundohan alang niining tuiga.

Ang tibuok pundo nga nagkantidad og ₱1,066,161.00, nga gikuha gikan sa 10% sa kinatibuk-ang budget sa barangay, nagsunod sa mandato sa Sangguniang Kabataan Reform Act of 2015.

Ubos sa maong budget, gigahin sa Dansolihon SK ang ₱409,500.00 alang sa mga programa nga magsuporta sa kalambuan sa kabatan-onan diha sa aspeto sa panglawas, aktibong pagpanginlabot sa komunidad, kalikopan, edukasyon, kalinaw ug seguridad, maayong panggobyerno, ug agrikultura.

Lakip usab sa maong pundo ang alokasyon alang sa honorarium sa mga opisyales ug miyembro sa konseho nga nagkantidad ₱259,200.00. Samtang ang ₱397,461.00 gitakda para sa Maintenance and Other Operating Expenses (MOOE), nga naglakip sa mga gasto sa biyahe, training, suplay sa opisina, uniporme, kuryente, pagmintinar sa mga ekipo, kontribusyon sa SK Federation, ug uban pang kinahanglanon sa operasyon sa buhatan.

Ang pag-aprubar sa maong SK budget gipaluyohan sa komite sa sports and youth development ubos ni Konsehal Kenneth John Sacala ug sa komite sa pamalaod ug reglamento ni Konsehal Edgar Cabanlas. (SPEscoltos/SP)