Mga programa sa Lapasan SK mapatuman na

Gilantaw nga mapalambo pa ang mga programa ug proyekto alang sa kabatan-onan diha sa Barangay Lapasan. Kini human ang konseho sa syudad sa milabayng sesyon nga gidumala ni Presiding Officer Protempore Konsehal Romeo Calizo misagop sa resolusyon nga nag-uli sa resolusyon sa Sangguniang Kabataan sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P4,299,004.00. Tipik sa mga programang gihatagan sa prioridad mao ang pagpalit og computer, printer, Smart TV, airconditioner, laptop, DSLR, projector, furnitures ug fixtures, filing cabinet ug mono block chairs nga magamit sa ilang buhatan.

Lakip usab sa gipundohan mao ang pagpahigayon sa mga programa alang sa edukasyon, youth employment and livelihood, kampanya kontra druga, pagproteher sa kinaiyahan, Linggo ng Kabataan, ug uban pang mga programa nga gilantawng maghatag sa kaarangan sa serbisyo nga matunol ngadto sa ilang ginsakopan.

Ang resolusyon nga gisagop sa konseho alang sa maong katuyuan gipaluyuhan sa komite sa sports and youth development ni Konsehal John Michael Seno ug komite sa pamalaod ni Konsehal Edgar Cabanlas.