Mga programa sa Bulua SK mapatuman na
MAHIMO nang mapatuman sa Sangguniang Kabataan (SK) sa Barangay Bulua ang ilang mga programa ug proyekto nga nahan-ay karong tuiga. Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa resolosyon sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P3,924,668.00.
Gihingusgan sa SK sa Bulua nga mapatuman ang programa pagtunol og benepisyo sa ilang mga kawani, maintenance expenses nga naglangkob sa training kabahin sa panglawas ug nutrisyon, paugnat sa kusog, capacity building, gender sensitivity ug uban pang programa nga gilantawng maghatag og dugang kaarangan sa kinabuhi sa kabatan-onan.
Migahin usab ang SK sa barangay og igong pundo alang sa pagpalit og duha ka unit laptop, DSLR camera, bluetooth speaker with microphone, mga gamit alang sa paugnat sa kusog. Ang resolusyon nga gisagop sa konseho alang sa maong katuyuan gipaluyohan sa komite sa sports and youth development ni Konsehal John Michael Seno ug komite sa pamalaod ni Konsehal Edgar Cabanlas.
Comments