Mga programa sa 17 ka IP barangay gihingusgan ni Cabaring

GIHINGUSGAN ni Konsehal Datu Roberto Cabaring, chairman sa komite sa cultural communities, ang  pagpahigayon og education information campaign ngadto sa tanang sakop sa 17 ka barangay sa syudad nga adunay Indigenous People (IP) communities.

Kini ang gibutyag sa konsehal atol sa sesyon sa konseho niadtong Lunes nga gidumala ni Bise Mayor Bebot Rodriguez, isip tipik sa iyang mga plano, programa ug aktibidad nga nakahan-ay karong tuiga alang sa sektor sa mga lumad.

Matod ni Cabaring nga gikinahanglan gayud ang education information campaign  pinaagi sa pagbisita sa 17 ka IP barangay aron mahatagan og katin-awan ug mapasabot ang Indigenous Peoples' Rights Act (IPRA) Law ngadto sa matag sakop niini, labi na ang ilang katungod isip kabahin sa komunidad.

Lakip usab sa plano sa konsehal ang pagmugna og assembly sa tanang sakop sa IP aron pormal nga matutokan ang mga programa ug proyekto nga maghatag kanila og giya alang sa mga kalihokan ning tuig 2025.

Samtang gihingusgan usab ni Cabaring nga matunol diha sa komunidad ang programa sa Gender and Development (GAD) Plan tungod sa sayo nga kaminyoon sa pipila ka mga miyembro ug uban pang mga programa nga naglantaw alang sa dugang pagpalambo sa kinabuhi ug makaaghat sa mga lumad pagpakabana sa giandam nga mga kalihokan.  

Nagpasalamat ang konsehal sa Konseho ubos ni Bise Mayor Bebot Rodriguez sa paghatag sa ilang dakong suporta sa miaging tuig sa mga programa sa sektor sa mga lumad.